PADOMAN HIDUK

PADOMAN HIDUK

Katiko ado ditahan
Tak lah ado baru dimakan
Bakulimaik sabalun habih
Ingek-ingek sabalun Kanai.

Dek caba mako mularaik
Dek himaik makono kayo
Dek ameh makono kameh
Dek padi mangko manjadi.

Bahimaik sabalun habih
Sadiokan payuang sabalun hujan
Manjilih ditapi aia
Maradeso diparuk kanyang.

Sasek diujuang jalan
Baliak ka pangka jalan
Takuk diujuang badia
Lari ka pangka badia.

Kok tasangkuk elok di nan tinggi
Kok basanda elok di nan gadang
Dibaliak pandakian ado panurunan
Dibaliak panurunan ado pandakian
Elok diambiak jo etongan
Buruak dibuang jo mupakaik.

HIDUIK BAPANDIRIAN

Bapikia palito hati
Nanang saribu aka
Taraso Lamak Jan dilulua
Taraso Paik Jan diluahkan
Bajalan injek-injek langkah
Bakato piaro lidah
Jan Hiduik bak pucuak aru
Maikuik kama kareh angin
Iyo kan nan diurang, lalukan nan di awak
Tunjuak luruh kalingkiang bakaik.

HIDUK BAKARUKUNAN

Elok tapian di nan mudo
Elok kampuang di nan tuo
Elok nagari dek panghulu
Elok musajik dek tuanku
Elok rumah dek Bundo kanduang
Nan tuo dipamulia
Nan ketek dikasihani
Samo gadang lawan bakawan.

PANYASALAN

Tabali dikabau batuntun
Bak aia jatuah ka kasiak
Bak batu jatuah ka Lubuak
Bak manggadangkan anak harimau
Bak malapehkan anjiang tasapik.

Kawan galak mudah dicari
Kawan manangih jarang basuo
Kawan hiduk paralu ditaliti
Indak jadi sasalan kasudahanno.

Balang bacampua kudo putiah
Rancak diambiak untuak Pacuan
Kok ka lai mandapek boko
Usah kito talampau piliah
Capek sajo ambiak putusan
Lah jadi sasalan mambuek bedo.

KAMANUSIAAN

Indak urang mambuang urang
Nan Buto paambuh lasuang
Nan pakak palapeh badia
Nan lumpuah pahuni rumah
Nan kuaik pambao baban
Nan binguang ka disuruah-suruah
Nan patah pangajuk ayam
Nan cadiak lawan barundiang
Nan pandai tampaik baguru
Nan kayo tampaik nan batenggang
Nan kuniang pananti Alek
Nan hitam pangubak pisang

Tukang indak mambuang kayu
Gapuak indak mambuang Lamak
Cadiak indak mambuang kawan
Gadang jan malendo
Panjang jan malindih

Nan ketek dikasiahi
Samo gadang lawan bakawan
Nan tuo dipamulia
Tibo di nan baiak bahimbauan
Tibo di nan buruak bahambauan
Dakek jalang manjalang
Jauah Cinto mancinto
Barek samo dipikua
Ringan samo dijinjiang
Kok hanyuk bapintehi
Kok tabanam disilami
Tarapuang samo hanyuk
Tarandam samo basah
Tatilantang samo minum ambun
Tatungkuk samo makan tanah

Manyisiak mano nan tirih
Malantai mano nan lapuak
Mambarui mano nan hilang
Mancari Kato mupakaik

Manyuruah babuek baiak
Malarang babuek jahek
Mahirik mambantangi
Manunjuak maajari
Managua manyapo
Tadorong maelo
Talompek manyentak
Gawa maasak
Maasak ka nan bana

Hanyuk ado nan ka maminteh
Hilang ado nan ka mancari
Tarapuang ado nan mangaik
Tabanam ado nan ka manyilami.

Latest Images

Trending Articles

Latest Images